Des Kiachagei

I muas net unbedingt in d' Kircha geih',
so hoaßt 's, a jeda' braucht hoi't des sei'.
In an Sunda', do bleub' i' schei' dahoam,
do brauch i' net mit 'n Auta foah'n.
I' drah' ma do den Radio auf,
do hob i' a scheine Mess' van Ö.Regional drauf,
daunn kau' i' nu' ollas aund're mocha,
wos i' sunst net tat, a gaunze Wocha.
Außa'dem muast a' bedenga',
do brauch' i' net ins Briaftasch'l g'lenga'.
Mia liegt jo nix drau' aum Gö'd,
i' foahr jo sunst a' umadum in da Wö't.
Jo du woaßt jo goar net, wos ma i' da'spoa',
des Opfagö'd sand a poar hunda't Schülling goa'!
De hau'md jo so vü' Saummlungan daneb'n,
do kau' i' jo zwoa Monat' davau' leb'n!
Außadem, ees wissts es net,
bleub i' vü' liawa' in Bett,
des au'ziag'n is' a so G'schicht,
schei' soi'st sei', sunst tuat 's es nit.
Du sogst a': "Is' de No'barin banaund,
do bi' i' scheina' mit 'n Oi'togg'waund!"
A' so geht 's oft do zua,
Ausred'n gibt 's grod g'mua'.
Es hoaßt oft: "Waun i' so ausschauad wia dea',
zoag' i' mi' in da' Kiacha' nimma' hea'."
Daun sog'n s': "Sand eh lauta' Schei'heilige drinn!"
Glaubst d', hätt' so wos wirkli' an Sinn?
Denn waun Zeit'n wieda' schlechta' wea'n,
daun kau'st soi'che Leit' wieda' aundascht red'n hea'n.
Drum glaub net, dass da 's Kirchageh' grod schod't,
vü' bleda' is va' so Ausred'n de Sö'nnot!

Quellen

Hans Pichler, Hofedl