Des Goashiat'n

G'schichtl

So mauncha hot ses oafoch g'mocht
und hot sei' Goas mit da Kett'n auf d'Wies'n brocht .
Um an Hois do hot's an Gürt'l g'hobt an broat'n,
so hots mit oana Umlaufkett'n fress'n kina auf da Woad'n.
Natürli' hot ma g'schaut das net in da prall'n Sunn'
wei's sunst an Hitzschlog kriag'n kunnt.
Mia hot a g'schaut das neb'n a Runs'n woa,
das a Wossa kriagt , is eh kloa',
hot de Runs'n owa g'fehlt ,
daun hot ma a Sechtal Wossa hi' g'stellt.
Hot de Goas daun a moi bleat und hot g'mecka't,
hots g'hoas'n " I hob koa Groß, i mecht wegga .
Mia hot den Eis'nstemp'n va da Umlaufkett'n ausa ,zog'n
und hot'n a poa Meta' wieda einig'schlog'n ,
aufpass'n host meas'n woa wo a Klee,
waun de Goas z'vü dawischt hot daun hot's des letzte moi bleat "meh",
de is daun voll woa'n
und is drau g'stoam .
Weu Ross und Goas Varrecka ,
des kau in Bau'n und Kloahäuslarin Schrecka .
Denn hot ma de Kua braucht und mia spaunt's ei',
do woa in Mücheimpa koa Müch daun drei,
oda de Kuah hot Trog'n ,
do is de Goasmüch guat, waun ma a Goas tuat hob'n,
Weu Roa , Staud'na und Stross'ng'stett'n,
frist a jede Goas und tuat so maunch'n Sogschneida saum't Familie van Hunga rett'n.
Denn a so a Eisenbaun'a Kuah,
is daun zan Üwaleb'n grod g'mua !

Zielpublikum

alle

Zusatz-Info

• Goas = Ziege
• Hois = Hals
• Gürt'l = Halsgurt für Ziegen zum Halten und Anhängen
• Umlaufkett'n = Kette mit Ring und Eisenstange zum Hüten von Tieren
• Sechtal = Ein kleines Holzgefäß zum Tränken der Tiere
• Voll werden = Aufblähen der Ziegen und Kühe beim Fressen von warmen Klee
• Kuah hot Trog'n = Die Kuh war befruchtet und war vor dem Kalben trockengestellt
• Roa = Raine
• Staud'n = Sträucher
• Stross'ng'stett'n = Strassenböschung waren Futterplätze für die Ziegen der Kleinhäusler

Quelle

Original von Hans Pichler, Hofedl