De foahrade Heasteign !

Aus Landschaftsgeschichten
Zur Navigation springen Zur Suche springen

"Liawa Arthur," sogt de Poldi, "Geh' he'st du net Zeit,
foahr ma fiari ins Bräuhaus, es is' eh net weit.
I' brauchat an Zwüfi, a Soi'z und a Möh',
i' brauch wos zan Kocha, kau'st toa' wia da wö'!"

Ea brummt zeascht a bissl, daun sogt a za iah':
"Schreub auf, wos d' braugst, und küh' ma ei' a Bia.
So foah' i' hoit g'schwind, bi' glei' wieda do,
hob an hauffa' Oa'wat, de Zeit geht ma o'!"

Und wia' a daun foah't ban No'ban voabei,
do lochan s' und deit'n s', ea' denkt se' dabei:
"Nau wos hau'm denn de heut', dass s' so freindli' schaun?"
Und ea' foahrt weita und trifft a poa' Bau'n!

De lochan und zoag'n aufs Autodoch hin -
"Do muass wos net stimma," kimmt eahm daun in 'n Sinn.
Do denkt a se', "Herrschoft, wos is do hiatzt nua,
de Leit' schaun aufs Auta, des losst ma koa' Ruah'!"

Und wia a ban Bräuhaus van Auta steigt aus,
do schlogt a de Händ' z'saumm', a des is a Graus!
Aum Packltroga aum Auta, do sitzt goa' a Heih'n,
de is mit eahm mitg'foan, kau' aundascht net sein!

Do hebt a s' glei' owa', geh Biwal, go go,
und daun druckt a s' zuwa und streich'lt as o'.
Ea tuat s' glei' ins Auta und kafft g'schwind wos ein,
ea mocht se s' goa' gnädi', foah't hoam mit da Heih'n!

Seitdem mocht de Heih'n um jed's Auta an Bog'n,
de foahrade Heah'nsteig'n, de hot se betrog'n!
G'moa't hot s', se kau's Gleichg'wicht nimma dahoit'n,
aum dumma'n woa 's ban Brems'n und Schoit'n.
Owa da Arthur hot g'lernt aus dera Soch,
ea schaut hiatzt oi'weu', waun a fuatfoahrt, aufs Autadoch!

Zusatzinfos

  • Arthur = der Wirt vom Forellenhof
  • Poldi = die Wirtin vom Forellenhof
  • Bräuhaus = Lagerhaus
  • Zwüfi = Zwiebel
  • Soi'z = Salz
  • Möh' = Mehl
  • wie da wöh = wie du willst
  • hauffa = viel
  • No'ban = Nachbarn
  • deit'n = deuten
  • Baun = Bauern
  • zoag'n = zeigen
  • Packltroga = Gepäcksträger
  • Heih'n = Huhn, Henne
  • eahm = ihm
  • owa = Herunter
  • Biwal, go go = Lockrufe von Hühnern
  • einen Bogen machen = ausweichen
  • Heah'steig'n = Hühnersteige
  • fuat = fort
  • foaht = fährt

Quellen

Gedicht von Maria Jaschke, Neue Waldhäusl

Aufgeschrieben von Hans Pichler, Hofedl