De Saublodern!

Is amoi' des Sau-O'stecha' g'west,
des woa' oi'weu' a kloa's Famülienfest.
Do woa' amoi' des Messaschleifa' gaunz notwendi'
mit 'n Wossa'-Schleifstoa', des tuat ma natürli' händisch.
Wossa' ei'g'fü't, und oana' draht,
daweu' da' aundare de Hockan und Messa' drüwa' zaht.
Den Sautrog mocht ma wossadicht,
dass a' ban Sauhaar'n rinnt daun nicht.
De Saurei'm wird a' aufg'stö't,
dass koa' Trum net föh't.
Es hot se' daun da' Sau-O'stecha' a Kriagl Most va'gunnt,
dass oi's guat umi geih' kunnt.
Daun hot ma g'faungt de Sau -
guate hundatfuchz'g Kilo hot de schau'.
Es hot dea' guate Mau'
dera Sau schei' zuag'red't und schei' 'tau',
weu' es hot domoi's schau' a jeda' g'wisst:
Haust d' und blea'st d' recht und des Bluatfaunga', des is nix,
weu' du kriagst koa' Bluat,
wauns d' de Sau recht aufreg'n tuast.
Drum hot ma mit Bedocht
des Sau-O'stecha gmocht.
Va' da' Sau hot ma oi's va'wend't,
a Va'wiastn hot ma domoi's goa' net 'kennt.
Bluat und Darm hot ma braucht zan Blunzn-Mocha',
und a' de Bloda' va' da' Sau woa' a' zan braucha'.
De hot ma aufblost mit an Strohreah'l und trickat daun,
des woa' in d' Schuach, weu' in Summa' ziagt neam'd an Sock'n aun.
Owa' a' fia' 's Pfeiffa-Raucka' fia' 'n Tobok,
do hot ma de Saubloda'n oi's Tobokbeidl g'hobt.
Da Sautaunz woa' a richtig's Fest,
es is' a' glei' za de Feia'tog und zan Dresch'n g'west.
De Sau, de woa' a' richti' schwa',
mia hot de Fett'n jo 'braucht a',
und is' de Sau üwa' hundatfuchz'g Kilo g'west,
daun woa' da Speck schei' kernig und a' fest.
Mia hot g'messn den Speck sodaun,
a via', fünf Finga' dick, des woa 's jo daunn.
Fia 's G'sö'chte nimmt ma de schenan Zenka'l,
ei'g'soi'z'n wia'd so maunches Renka'l.
So is drei Wocha' in Fleischküwi' in da Sur,
und daun kimmt 's mit da Fleischoih'n auf de Schnur.
A poa' Moih'zeitn hot ma an Brot'n ei'g'rext,
mia glaubt des wa' des best'.
Mia hot a 'bet't fia' 's tägliche Brot,
und a Aufbesserung woa' natürli' oi'weu' a' so a Sautod!

Botschaft

Das war die Zeit ohne Kühl- und Gefrierschrank.

Zusatzinfo

• Saublodan = Schweinsblase, wurde immer aufgeblasen und getrocknet
• Va'wiastn = Verwursten, das Fleisch zu Wurst verarbeiten
• Fleischoih'n = Fleisch-Ahle, Spieß mit Griff und Loch hinter der Spitze, um Fleisch zu durchbohren und dabei eine Schnur hindurchzufädeln
• ei'g'rext = eingekocht und luftdicht verschlossen in REX-Gläsern

Quelle

Hans Pichler, Hofedl