Daung'lgoas

Aus Landschaftsgeschichten
Zur Navigation springen Zur Suche springen

Solaung i' z'ruckdeng, wos i' woaß,
haum mia schau' unsa Daung'lgoaß,
sie is' schau' oi't, mia kennt iah' 's au',
voi' Spring' is s' und va'weda't schau'.
Waun s' a' so wia d' Leit' kunnt' red'n,
do wissat s' vü' schau' zan dazöh'n.
Va' de oi'd'n Zeit'n und friachan Joah'n,
wo koa' Traktoa' und koa' Maschin' is' g'foah'n.
wo 's Mohda geb'n hot ummatum,
de schau auf und foat sand voa' da Sunn,
de g'juchatzt hau'm oan den aundan z' Neid
recht gugahö - des woa' a Freid'.
Do woa' um d' Daung'lgoaß jo nu' a G'riss,
weit meah' oi's hiatzt, des se' is' g'wiss.

Heit gibt 's fia' d' Sengst jo nimma vü' zan toa',
a wen'g a G'stett'n und a schmola' Roa'.
sunst is' fia d' Sengst nix üwablüb'm,
oi's aundre maht de Maschin'!
So wiad s' a' sö't'n, boi'd gaunz goa',
dass ma hea't an Daung'lstoa'.
So mauncha Vota' sitzt hi' und wieda
auf da Deng'lgoaß a Neicht'l nieda.
Stopft se' sei' Pfeiffa'l und brennt se' 's au'
und faungt daun ins Daung'ln au',
schei' in Takt, net stahd net z' gschwind,
dass da Aumboss schei' lusti' klingt.
Grod a so wia 's friaha is' g'wes'n,
daweu' 's nu' koa' Maschin' hot geb'n !

Zusatzinfos

  • i' woaß = ich weiß
  • Daung'lgoaß = Dengelamboss mit Gestell
  • vaweda't = verwittert
  • friachan Joah'n = frühere Jahre
  • Moda = Sensen-Mäher
  • umatum = rundherum
  • auf und foat sei' = aufstehen und aufbrechen
  • Sunn = Sonne
  • g'juchatzt = gejauchzt
  • oan den aunda'n z'Neid = einer den anderen beneidend
  • gugahö = hellwach
  • um wos a G'riss sei' = etwas ist sehr gesucht, die Leute reißen sich darum
  • d'Sengst = Sense
  • Gstett'n = steile wirtschaftlich unbedeutende Wiese
  • Roa' = Straßen- oder Wegrain
  • üwablüm = übriggeblieben
  • Daung'lstoa' = Dengelamboss
  • a Neicht'l = eine Weile
  • wia 's friaha g'wes'n = wie es früher war

Quellen

überliefert von Leopold Hackl, Reitzendorf, Martinsberg

aufgeschrieben von Hans Pichler, Hofedl, Yspertal