Daumpfadreschn

Zeitig in da Fria wiad da Kessl g'hoazt,
das daun ban Dresch'n jo net roazt,
weu um sechse in da Friah,
pfeift da Daumpfa schau a's wia.
Ei'lossa und Maschinist san de erscht'n,
ba da Suppn [Stosuppe] daun moast Zwoanzg Leit' wean.
A Schwö muas do heabei sei,
doat losst ma voahea 's Wossa ei'.
Es is da Treub Ream' schau g'spaunnt
und da Maschinist losst in Daumpfa au',
da Ei'lossa is in Ei'staund drin
und auf da Maschin de zwoa Zuwi-Beidlerinn'.
Zwoa san zan owa- oda auffigeb'n,
fünf Schwo'mbinda und oani zan daunaleg'n.
oana zan Schwo'm nochizan
und a Schuiabuam ba de Gra'n,
er muas de Gra'n in de Streihitt'n trog'n,
owa sunst hot a eh nix z'sogn.
A stoaka Mau' tuat Schwo'm auffi geb'n
und auf da Seit'n kau'st in Otroga segn,
der muas auffi auf den Körnabodn,
der is auf oana Hittn drobn
und auf an aundan Eck,
do wean de Schwo'm vasteckt.
Fias Ess'n hot ma gmua g'richt
und meistn's ma do a Sau o'sticht.
Owa in da Kuch'l do gehts rund
und in Dreschan wassat schau da Mund.
A so geht's za da Jausn und zan Mittogmoi
und o'gei tuat nix auf goa koan Foi.
Weu hostas mit de Leit vadau,
daun faungt de Maschin zan roaz'n au'.
Sunst geht a weu wos weita
und vahoatzt woan a poa Metta Scheita.
Es san um de 700 Mandl drosch'n woan
und es geht wieda au, des Daumpfa foahn.
Da Maschinist is mit da Ö'kau'l g'rennt und ois tau,
er hot a Prüfung und Oawat recht genau
und 's Wossa o'lossn des woa wichtig,
dass'd 'a foan mochst mit'n Daumpfa richtig.
Da Hoiban is' hiatzt wieda frei,
do muas daun da Howan drinnan sei!

Zusatzinfo

• Fria = Frühe
• Kessl = Dampfkessel
• Za da Supp'm = Die Stosuppe
• Schwö = Wasserbecken bei größeren Bauernhöfen oft mehrere
• Treubream = Treibriemen zum Antreiben der Dreschmaschine [20 m und drüber]
• Ei'lossa = Einlasser brachte das Getreide in die Druschtrommel
• Eistaund = Arbeitsplatz des Einlassers
• Körnaboden = Getreidespeicher
• O'troga = Getreide mit dem Jutesack auf den Getreidespeicher tragen und entleeren

Siehe auch Dampfer!

Quellen

Hans Pichler, Hofedl

Historische Radiosendung von 1984, wieder ausgestrahlt auf Radio Salzburg am 3. August 2022, ab 20:03, zum Nachhören auf https://radiothek.orf.at/sbg/20220803/SGNA