Da Wossagraund

Des Fließwossa, des woa friaha rar,
weu jo niagns a Wossaleitung wa'.
Mia hot des Wossa in da Runs'n g'faungt,
owa za oana Wossaleitung do hot's laung net g'laungt.
So woas aum Laund fost üwaroi,
a in unsa'n schen Yschpatoi.
Weu fost olle Quell'n hecha woan,
is des Wossa va' oana Runs'n zuwi' g'leit woan.
Es is g'runna Tog und Nocht,
net vü, owa g'mua hots zuwi brocht,
da oane Graund der woa ban Stoi',
zan Viech wassa'n, do tuat se's boi'
und a in da Kuch'l aus Stoa,
do rinnt des Wossa a aloa'.
So woa des Wossa do jo koa' G'frett,
weu pump'n und weit trog'n, braucht mas net.
Es hot in Stoi koane Se'bstränka geb'n
und koa Bod oda Brause hot's a nu söt'n geb'n.
'S hoasse Wossa zan rasiern, des woa van Schief
und sunst hot's zan wosch'n 's koite Wossa g'richt.
Do hots g'hoaßn: do spaunt d'Haut,
dass ma jo koa' hoass' Wossa hot braucht!

Zusatzinfo

Graund = granitener Trog

Quelle

Hans Pichler, Hofedl