Da Pfluag

Da Pfluag vakimmt in hinter'n Eck,
es duat net laung, und da letzte is' boi'd a' weg.
Wer braucht 'n den heit' nu', den haut ma z'saum',
weu' ma nua' mea' glaubt, des is' eh nua' meah' a Kraum.
Den oi't'n Bau'n, den foi't des hoa't,
und es tuat eahm um den hü'zan' Pfluag moast' load.
Daweu' ma ei'gspaunt hot de Ross',
do woa' de Zaug jo a' nu' wos,
weu' a' daweu' a' g'wirtschoft't hot,
san' g'west da Pfluag und d' Ross da beste Kaumarod.
Waun a' mit sicherer Haund
fest einidruckt hot ins Ockerlaund
und mit an fest'n Schriat
is' 'gaunga' ea' und hot des g'spia't:
do kimmt aus 'n Bod'n a hoamliche Mocht,
de eahm zan Bau'n erscht richti' mocht.
D'rum woar a' auf den Pfluag a' recht stoi'z
und siacht in eahm mehr wia a tot's Hoi'z.
Hiatzt hot ma an Traktor großmächti'
und a' oft in da' Nocht foah't ma laungmächti'.
Hundsmiad is' a' trotzdem mehr,
a' waun a' noch 'n Pfluag nimma geht her.
Do g'spia't ma a' nimma de Kroft,
de oan mit 'n Bod'n verhoft't,
wia der, der üwa' 's Ockerlaund
den Pfluag hot g'führt mit seiner Haund!

Zusatzinfos

• Pfluag = Pflug
• z'saum' = zusammen
• Kraum = Kram, unnützes Zeug
• oi't'n Bau'n = alten Bauern
• hü'zan' Pfluag = hölzernen Pflug
• Ross' = Pferde
• Zaug = Gespann mit Zugtieren
• Ockerlaund = Acker, Feld
• Schriat' = Schritte
• g'spia't = gespürt
• tot's Hoi'z = totes Holz
• Pfluag hot g'führt= Pflug gelenkt hat

Quellen

Hans Pichler, Hofedl