Coronavirus

Van Corona-Virus hot do' koana glaubt,
dass dea ba uns amoi' oi's zaumhaut.
In China hot des oi's au'g'faungt,
mia hau'm se denkt: is' weit weg, Gott sei Daunk!
A wia noch Österreich g'kema' san' de zwoa,
hot ma' se' denkt: au'gsteckt san' eh a' glei' a Poa'.
Schnö' is gaunga nocha daun,
ban Après-Ski kemman daun vü' Leit' z'saum'.
So is' woa'n Ende Februar,
wo vü' in Ischgl Schifoah'n woa'n.
Oa' Lokal wia'd do' daun g'sperrt,
so hot ma' va' Ischgl g'hea't.
In China woa 's a gaunze Stodt,
und in Norditalien woa' 's de große Not.
ba uns, do tritt de Regierung z'saum',
weu' s' in Tiroi' schau' Mua'ds-Probleme hau'm.
Noch an einstimmig'n Regierungsbeschluss
a Kontaktverbot in unsa'n Laund kemma muss.
Mit dem ausnauhmslos'n Kontaktverbot,
do steht Parlament und Regierung einstimmig grod.
Wos ba uns mit Ehrenwort geht,
do dischkuriert gaunze drei Wochan de gaunze Wö't.
Olle Veraunstoi'tungan üwa' fünf Leit' is' net erlaubt
fia alle, waun a aun de Coronapandemie net glaubt.
Hotel, Schilift, Café und Wirtsheisa hau'm zua,
owa' zan Ess'n und Klopapier gibt 's g'mua'.
So mauncha probiert 's mit da Hamsterei,
nua' zan Gö'dmocha' san' s' net g'kemma', des woa' schei'!
Oan Meta Obstaund muass üwaroi' do sei',
und ob 16. März gibt 's koa' Schui'gei',
koa' Mess' und Kirchliche Feier,
und trotzdem kimmt da Frühling und a' Ostern wird 's heier.
Besser oi's mit Stress und Renna,
wos ma jo eh nimma kenna',
mit Besinnung kau' 's nua' bessa' wer'n, des is' kloa',
weu' 's voa'hea' eh nimma' des richtige Leb'n woa'.
De beste Mö'dung kimmt van Trump in USA,
und da Brite Boris Johnson jo nu' g'scheita wa',
de Türken sog'n do glei,
Corona-Krisen gö't'n net fia' de Türkei.
Owa 's Fruihjoahr kimmt trotzdem ins Laund,
vü' schena' is' da Hümmi' und de Meeresstraund',
mia siacht wieda' Fisch' in Venedig,
und so maunche Soch', siacht ma, is unnetig.
De Vög'l hau'm an' schena'n G'sang,
i' glaub' des an da Natur da Dank.
Vielleicht brauch' ma a' koan' tei'n Klimaschutz,
dua'ch weniga' Konsum wia'd unsa' Laundschoft putzt.
Vielleicht hau'm ma daun vü' weniga' Sorg'n,
waun ma weniga' Kilometa' foah'n.
Mia da'spoa'n uns a Hauffa' Gö'd
und rett'n so unsa' scheine Wö't.
So siacht ma, dass an a' guat'n Politik,
Entschlusskraft, Geist und Hirn d'rin liegt,
und vielleicht wia'd durch de Coronakrise oi's neich,
es lebe unser schönes liebes Österreich!!

Quellen

Hans Pichler, Hofedl