Christmette

Aus Landschaftsgeschichten
Zur Navigation springen Zur Suche springen

Geschichten rund um Weihnachten

Es hot se zuatrog'n vor launga' Zeit
in da Mett'n-Nocht, da Weg zua Mett'n woa weit.
De Öta'n haum za da Mett'n den Weg alloane g'mocht,
und des Dutza'd Kinda haum dahoam g'wocht,
es san üwa' a Dutza'd g'west,
de ödan Kinda' haum auf de kleanen aufpasst, des steht fest.
Des Mett'naumt woa um Mittanocht oiweu,
und des Hoamkemma woa fost um hoiwa drei.
Wia s' z'Fuaß hoamkemma san,
woa ois gaunz stü' noch dan,
und se haum koan Christbam g'seg'n,
nindascht is a Tennannod'l g'leg'n,
net in da Stu'm und net aum Gaung -
jo, wo is a den daun?
A in da Kuch'l woa nix,
owa aum Tisch san drei Sprudl' g'leg'n des woa fix,
des letzte, wos van Christbam nu üwa woa,
woan de drei Sprudl' - des woa do gaunz kloa'.
Da kleana' Sprudl', dea woa fia 's Kindako'h,
da mittla', dea woa fia de Stosupp'n do
und da greßare woa fia de Kiah-Au'gob,
waun a Kuah a Käuwi' kriagt hot.
Des woa da Traunk mit de Kleum
und dass de Kuah g'sund tuat bleum.
Fei' sauwa putzt woan de drei,
so wia 's da Brauch tuat sei'.
De Öpfi' und Lebkuch'n, de woan g'ess'n,
vierzehn Kinda haum se do net au'strenga meass'n.
Des ollas hot se zuatrog'n voa siebz'g Joa'hn,
wo ma net vü g'hobt hot, owa z'fried'n woan.
In de Kiacha is ma z'Fuaß nu gaunga,
de Motorisierung hot ea'scht späta au'g'faunga.
Owa de Kiachan, de woan nu bumvoi,
weu a jeda hot g'wisst, das ma bitt'n und bet'n soi'.
Dazöh't hot des de Bäurin aum next'n Tog,
iana Freindin, de se recht gern mog.
Sie hot ihre Kinda trotzdem g'lobt,
obwoi s' koan Christbam mea' haum g'hobt!

Zusatzinfos

  • Mett'n = Mitternachtsmesse zu Weihnachten
  • de Öta'n = die Eltern
  • Dutza'd = Dutzend
  • dahoam = zu Hause
  • ödan = älteren
  • (Hoch-)Aumt = Hochamt - feierliche Heilige Messe zu besonderen Anlässen (lat. missa sollemnis)
  • oiweu = immer
  • nindascht = nirgendwo
  • Tennannodl = Tannennadel
  • Sprudl' = Sprudler, aus dem Tannenwipfel hergestellt
  • kleana' = kleinere
  • Kindako'h = Kinderkoch, Grieskoch
  • mittla' = mittlere
  • Kiah-Au'gob = der erste Trank nach dem Kalben der Kuh (Biestmilch, Kolostrum)
  • Käuwi' = Kalberl, Kälbchen
  • Kleum = Kleie, ein Abfall bei der Mehlerzeugung
  • iana = ihrer

Quellen

Erzählt von Monika Haider bei unserem Treffen Landschaft verstehen in Yspertal

aufgeschrieben Hans Pichler, Hofedl