Butterresl

Es woa' a'moi' voa' launga' Zeit,
noch 'n Kriag, do woa' 's so weit,
kam oana' hot Oa'wat und a Gö'd,
noch 'n Kriag, noch da varuckt'n Wö't.
Hausiera' hot 's do bei uns nu' geb'n,
ohne Asphalt woa'n olle Stroß'n und Weg'n.
Aktiv woa'n nu' olle Kirchasteig'n,
des woa'st aum schnölst'n in da Ortschoft za de Zeit'n.
A' de Butterresl is' so za olle g'kemma'
und tuat Butter, Eier und Hend'l a' mitnehma',
g'haund'lt hot de Resl Schauer mit den Socha',
und so kriagt so maunche Bäurin a' a Gö'd unta' da' Wocha'.
So maunche Mark und Schülling kimmt ins Roi'n,
weu' mit den Gö'd dast d' domoi's a' zoi'n.
De Resl geht mit Rucksock, Tosch'n und mit 'n Erdba'nsock,
za de Bau'n und Kloa'heisla' Tog fia' Tog.
Owa'n Deuschl-Wia'tshaus is' a Tofi', do steht g'schrüb'n:
do gibt 's "Butter, Eier, Hend'l billigst", ihr Lieben!
Ba da Schwesta' Frau Deuschl hot ma domoi's g'wohnt,
owa' in da' Sun lieg'n, des hot ma niamoi's 'taun.
De Hendl hot s' a' g'rupft und ausg'numma und vapockt
und g'weg'n genauest auf da Zoaga'woog'.
A jeda' in Oit'nmoarkt hot des g'wisst,
dass do de Butterresl mit ihre Qualitäten dahoam ist!

Zusatzinfos

• Hausierer = Händler, die mit Rucksack und Bauchladen von Haus zu Haus gingen
• Kirchasteig'n = Wege, wo man am schnellsten bei Kirche und Ortschaft war
• Mark = Reichsmark, die in der Nachkriegszeit noch zur Zahlung galt
• Erdba'nsock = Kartoffelsack für die Hühner zum Transport
• Tofi' = Tafel
• Zoaga'woog = Zeigerwaage
• Oit'nmoarkt = Altenmarkt
• Butterresl = Schauer Theresia, die mit Butter handelt

Quellen

Hans Pichler, Hofedl