Birl Hocka
G'schichtl
Birlhocka woa meist'ns auf a Wies'n oda Roa,
wo se de Sunn schei zuwi loat,
Ban Stauna o rama hot ma noch'n ausschlog'n sodaun,
auf an Stöckl zan Birl hoka g'faungt aun.
Zeascht hot mas zaumzaht auf a Mohd,
das ma des Birlreisa g'hobt hot grod.
Wied'n hot ma ois erschta braucht zan bind'n
und mia hot Biran g'suacht und hot g'schlogn de Rind'n,
das mas ban bind'n des hoate Oat einedraht
und des bundne Birl net ausanaunda zaht.
A hoibs Klofta woa des Birl ca. laung
und g'hokt hot ma mit' Reisahackl daun.
G'hokt hot ma ois wos do g'legn is auf da Erd,
Biran, Ölex'n, Hosl, Edln, Holla wos hoit sunst nix wert.
G'hokt hot van Hof boid a jed's Weiwaleit
und vü hots geb'n, de hot de Oawat muats g'freit,
se haum um d'Wett oft Reisa g'hokt
und haum boid a Hauffa Reisabia'l banaunda g'hobt.
De haums daun zaumglegt zan Trikan auf an Stoß
und oft is dea Hauffa muats drum groß.
Se haum oft a ban Kiacha geh' a proit,
das dreihundat Birl g'hokt haum boid.
So woan de Birl zan Trikan den Summa iwa,
oft san s' a weniga woan, des woa schau a zwieda.
Owa de meist'n haum schau dahoam in Ofa aubrennt,
und hoffantli woans daun do net z'weng!
Zusatzinfo
- Biran = Birke
- Birl = Zusammengebundenes Reisigbündl
- Ölex'n (Elixen) = Traubenkirsche
- Stauna = Sträucher
- Stöckl = Baumstumpf ca. 50 cm hoch als Hackstock
- trickan = trocknen
- Hos'l = Haselnuß
- Edl'n = Erle
- Holla = Hollunder
Quellen
Hans Pichler, Hofedl
