Autofoahraleid'n

Waun i aum Parkplotz woat'n tua
und schau den Autofoahran auf da Stroß'n zua,
do tuast do deine Wunda daleb'n,
wos fiare Autofahra tuat's do geb'n.

Da oane hot a Auta, a muads Trum,
stiat dauand in da Nos'n umadum,
den aundan, den liegt goa nix drau',
schaut se rundumadum de Geg'nd au'.

A dritta huckt in sein Auta gaunz schief,
dea sitzt drin', dass di' da Schlog, moa'st, trifft.
In next'n Auta sitzt a nobla Herr,
jo g'schoint is dea, ois war a wer.

Do' ne'm eahm sitzt a aufputzte Doka,
schaut drei', ois tats a weu wos mocha.
Da nexte braucht de gaunze Stroß',
schaut oin und jed'n Diand'l noch!

Hiatzt kimmt oana, dea is' a Lümmi', gaunz a großa,
tuat a ba'n Foahn, ois wa' ea'm z' schlecht va de Leit des Wossa,
dea nimmt se in Voaraung, wia 's eahm passt jo grod,
und a jeda aundare Autofoahra hot sei große Not.

Owa es gibt a b'sundare, de aufpass'n ban Foah'n,
und de foah'n net as wia de Noa'n,
de a fia aundare dengan mit
und ea' Foazeig g'wiss'nhoft lenk'n und 's Hirn haum a mit.

Voa soichane kau'st in Huat ziag'n,
do braucht da 's da Stroß'nvakea net stia'n.
Amoi siach i' oan sitz'n gaunz vadraht,
dea tuat rauka und telefonier'n, dass 'n gaunz vazaht.

Des Tog woas voa an Raund,
schmiad goa oane mit'n Lipp'nstift umanaund,
und desnext glaub i schau', i spinn',
hot oana in Finga in Oawasch'l drinn'.

D'rum schreubt ma de Stroß'n groß,
weu hoit so vü is' los.
So tuat so mauncha recht vü ban foah'n,
telefonier'n, ess'n, trinka und a nos'nboan.

Rauka, schnupfa und Notiz'n aufschreum,
Roman les'n und, moa'st, aum aundan Sitz umi greun.
Es haum 's ban Auto foah'n de meist'n gnädi',
gaunz wuascht, is a vaheirat't, Single oda ledi'!

Zusatzinfos

• moa'st = du möchtest meinen
• g'schoint = "in feiner Schale", gut angezogen
• rauka = rauchen
• vazahn = verziehen, in die falsche Richtung geraten
• Raund = Weile
• desnext (desnächst) = neulich
• Oawasch'l = Ohrmuschel
• es gnädi(g) haben = es eilig haben

Quellen

Hans Pichler, Hofedl