A Viecharei

 
De Muata schickt den Sepperl ins Wirtshaus wieda heit',
ea' soi' den Votan sog'n, zan Hoamgeih' wa' schau' Zeit.
Do kimmt da Seppal boi'd schau' z'ruck und sogt: "Muata, du i' moa',
heit muasst in Vota sö'wa hoin, ea' is nimma alloa'!"

Ea' bringt an' Hauffa' Viecha' mit, ea haundlt se s' grod ei'.
"I gib eng do koan Es'l o," hea' i' den Votan schrei'!
"Es muass net grod a Es'l sei, a Off' geht a' gaunz g'wiss,"
hot daun da Krauma g'sogt, dea' a' im Wirtshaus is'.

So haundl'n s' gaunz wü'd hin und hea, und Viecha wean do g'nennt,
de ma - des woaß i' sicha - in da Schui' net kennt!
"Des wiad heit' a Gaudi wean, Muata du i' moa',
fia' an so an Haufa' Viecha' wiad unsa' Goaßstoi' z' kloa."

"Jo, jo," sogt do de Muatta d'rauf, "Du host net unrecht do,
und zan Hoamtreu'm va den Viecha'wea' nimm i' 'in Ox'nzei' danoh!"

Quellen

von Leopold Hackl, Reitzendorf, Martinsberg

Aufgeschrieben von Hans Pichler, Hofedl