A'Gschicht üwan Poig'nsunda!

Hektisch geht 's oft zua za jeda Zeit,
dass di' des Leb'n boid nimma g'freit.
So is' a oft za da Ostazeit,
dass di' daun oi's schau g'reut.
Es is' so viakemma in da Fost'n,
du mech'st o'nemma und a mit 'n Geist amoi rost'n.
so faungst d' guat au' noch 'n Aschamittwoch daun,
und schei' laungsaum passt da wieda dei' G'waund.
Owa an Tog voan Poig'nsunda, do hot se' 's Blatt'l g'wendt,
voa'bei is' da Fried'n, und es wiad wieda g'rennt.
Schau' ban Ei'kaffa hot 's a große Plog,
bis dass de Moahm oi's banaunda hot.
Kocht wiad hiatzt wia a Wüda,
jo de Fost'n wiad iah' eh schau' z'wida.
An Guglhupf hot s' a' nu g'mocht,
gaunz spot nu daun auf d' Nocht.
Sie legt se' daun in Gott's Naum' nieda,
do' a schlechta Tra'm weckt s' auf daun wieda'.
Hob i' den Guglhupf a' g'mua g'schlog'n,
hoffantli' bleubt uns dea net lig'n in Mog'n!
Weibeed'l hob i' eh a' eini tau'?
Woa d' Germ nu guat, dass a mia net foit zaum?
So kugl't s' im Bett umadum de gaunze Nocht,
wo a jed's aundare Leit guat schloft.
Owa in da Friah ban aufstei' daun.
foit ba ia' des Söbstbewusstsei' zaum.
Sie hot nämli' gestan vagess'n zan Boaz'n
den Brot'n; es muass daun do' nu roaz'n.
Za da Poig'nprozession, do wü' s' a' nu geih',
do reißt sa se' den Finganog'l a' nu ei'.
Poig'nkatz'l hot s' jo a nu wo g'hobt,
si hot se' jo ban Suacha schau' so vü' 'plogt.
Sie suacht und suacht und find't s' hoit net',
se san auf oa'moi' hoit oa'foch weg!
Do mocht da Mau' daun an Brumma:
"Du, de hob i' oi's Steckling g'numma."
Weu' dass d' next's Joah' net laung suacha braug'st,
hob i' s' ei'gsetzt ba da Goat'nmau' do draußt.
Va'weufet is, iah' kimmt des Rean,
hiatzt muass 's jo schau' boid hoiwaochti wean!
So gean hätt' s' den g'schnitzt'n Poig'nes'l g'segn,
und da neiche Herr Pfoarra wa' iah' a' guat g'legn.
Sie sogt za iah'n Mau': "Waun a B'suach a' nu kemmat,
i' moa i' tat' heit' aum liabst'n davau'renna!"
Ban Fruahstuck, es schmeckt iah' nix sodaun,
da Guglhupf schmeckt a' net, ea is' a wen'g dunk'lbrau'.
Auf oa'moi' leit't des Telefon a' nu g'schwind,
iah' Schwesta sogt: "Du, i' kimm' noch da Mess' mit 'n Kind."
Hiatzt is' iah' do' daun oi's z' vü',
weu' de zan Ess'n sicha a Extrawuascht wü'.
Des Wei' mit iah'n Mau' daun schreit:
"Zan Zeirungles'n hau'm mia hiatzt koa' Zeit!
Du muasst ma hiatzt in Kölla' geih'
und hoi'n Er'ban, Meahra und an Krei'.
Hiatzt muasst ma' a' de Er'ban schö'n,
weu' mei' Schwesta hot oi'weu' g'rü'me Kned'l gern meg'n!"
So geht 's mit da Oawat weida
und o'brocht is da Poig'nsunda-Feita'.
Es is' daun schei laungsaum ö'fi woan,
bis dass da B'suach daheag'keima is' g'foah'n.
D' Freid van Wiedaseg'n woa' groß, sie sogt: "I hob vagess'n,
dass i' weg'n de neich'n Zänt nix kau ess'n.
Aussadem fost i' schau de längste Zeit,
fünf Kila weniga und i hob de greßte Freid'.
Ausg'glicha bi' i' wieda wia voa' Joah'n,
und jed'n Sunda' wia'd wieda in d' Kiacha g'foah'n."
Drum do siacht ma: hätt' des Wei' in Glaub'n und d'Ruah g'fund'n,
hätt se net aum Poig'nsunda mit da Oawat g'schund'n.
und hatt' s' losloss'n van Unedig'n voa' oi'n,
wa' s' in d' Kiacha gaunga, hatt' s' iah' bessa tau' und g'foin!

Zusatzinfos

• Poig'nsunda = Palmsonntag
• Fost'n = Fastenzeit
• Moahm = Muhme, Tante mütterlicherseits, allgemein weibliche ältere Verwandte
• Wei'beed'l = Weinbeeren, Rosinen
• Boaz'n = Beizen, in salzige Marinade einlegen
• Er'ban = Kartoffel ("Erdbirnen")
• Meahra = Karotten (Möhren)
• Krei' = Krenn
• g'rü'me = geriebene
• Kned'l = Knödel
• meg'n = mögen
• Feita = Feiertag
• Ausg'glicha = ausgeglichen
• Unedig'n = Unnötigem

Quellen

Hans Pichler, Hofedl